Alteram sessionem anni academici celebravimus die 11 mensis Octobris anni 2022.
Res inter sessionem tractatae
I. Novi sodales se introducunt.
II. Litterae recentiores: Ephemerides Statistico-Politicae
Christianus introduxit et proposuit legendam ephemeridem quandam Latinam Posonii in Hungariā (sive Slovaciā hodiernā) saeculo XIX ineunte editam, de quā plura in scriptis Theoderici Sacré inveniuntur:
Dirk Sacré, ‘Uit een Latijns nieuwsblad, 1804’, Kleio. Tijdschrift voor oude talen en antieke cultuur 51, 4 (2022) 159-171.
Theodericus Sacré: De Ephemeridibus statistico-politicis (1804) sive de nuntiis Latinis ex urbe Posonio emissis (https://academialatinitatifovendae.com/narrationes/2021/3/22/de-ephemeridibus-statistico-politicis-1804-sive-de-nuntiis-latinis-ex-urbe-posonio-emissis, 2021).
Theodericus Sacré, ‘Ab oblivione vindicentur … ‘Ephemerides statistico-politicae’ (1804)’, Melissa 221 (2021) 4-11.
Ephemerides statistico-politicae (Posonii, in Slovacia), 1804-1838
Acta diurna (id est bis in septimana). Aloysius Belnay (1766-1809) erat auctor. Annus 1804: 835 paginae. De Latinitate in Hungaria: in parlamento, de agricolis, de curriculo, … Vix inveniuntur exemplaria.
(1804). ANGLIA. Exhibetur specimen illius orationis, quam ad 30. Mai. in inferiori ordinum curia pro abolendo nigritanorum mercatu D. Wilberforce peroravit; cuius tenor semper lectores qui humanum cor habent delectabit. (…)
Res ita habet. Si quando accidit ut deputatum huic mercatui navigium non tam cito suis, ut cupiebatur, oneretur mercibus methodo usitata, tunc vicini populi ad mutuam invicem collisionem concitantur; tunc mediis noctibus villae integrae incenduntur, earum habitatores, viri, mulieres, parvuli de mediis flammis elabuntur, comprehenduntur, ad litora deducuntur, nostris mancipiorum quaestoribus venumdantur, nostris denique navigiis onerati ad insulas Antillanas pervehuntur. Et huic plagio tam horribili nomen commercii est inductum!
Et istae horridae tam late patent in Africanis oris operationes, ut non solum regiones adversus regiones, sed villas adversus villas, vicinos ipsos contra vicinos armari quam saepissime videas. (…) Immo vero parum dixi. Nam et ipsi promovendis illocati coloni moribus civilibus et Christianis per has regiones concurrunt ad haec iniqua stratagemata.
